Hvað er Fjallavinafélagið Kári

Fjallavinafélagið Kári á sér ekki langa sögu.  Upphaf þess má rekja til þess að "Haukarnir þrír" (ekki rugla þeim saman við vitringana þrjá, þó þeir hafi stundum verið nefndir vitleysingarnir þrír. Til nánari aðgreiningar hefur verið bent á að vitringarnir þrír komu færandi hendi með "gull reykelsi og mirru" en vitleysingarnir þrír komu með "bull, ergelsi og firru") fengu þá hugmynd að flúðasigla Jökulsá á Brú gegnum Dimmugljúfur, svona á meðan það er ennþá hægt, og gera um leið heimildarmynd um leiðangurinn og gljúfrin.  Þar sem þarna var um talsvert fyrirtæki að ræða þótti nauðsynlegt að hafa einhverja kennitölu bak við framkvæmdina og því var stofnað félag og það skráð hjá Hagstofunni.  Félagið var því í upphafi hugsað sem sá lögaðili sem stæði á bak við skuldbindingar sem þessu tengdist og Haukarnir bæru sameiginlega og jafna ábyrgð á.  Fjallavinafélagið í þessum skilningi er ennþá til og á höfundarrétt á heimildarmyndinni, auk þess að hafa á aðgerðaáætlun að framleiða erlenda útgáfu af myndinni.  Einhvers staðar er líka til hugmyndarammi um frekari kvikmyndagerð um ævintýramennsku í íslenskri náttúru.

Meðal þess sem til þurfti til að framkvæma leiðangurinn í Dimmugljúfur var úrval af góðu fólki, s.s. kraftmikla ræðara, nóg af góðum jeppum, kokka, aðstoðarmenn fyrir kvikmyndatökulið o.s.frv.  Umfram allt, fólk sem kynni að ferðast í íslenskri náttúru og þekkti ekki hugtakið sérhlífni nema af afspurn.  Haukarnir smöluðu því saman þéttum kjarna af fjallafríkum sem féllu að þessum kröfum.  Úr þessum hóp varð til sá ferðahópur sem Fjallavinafélagið samanstendur af í dag.   Nokkrir góðir hafa bæst við hópinn síðan með því að taka virkann þátt í ferðum félagsins, þannig að félagið fer enn stækkandi. Þessi hópur flækist saman um hálendið með ýmsum hætti, akandi, gangandi eða hjólandi.  Meðal fastra liða hjá hópnum eru hinir árlegu Káraleikar, sem er einskonar fjölskylduhátíð þar sem keppt er í hinum fjölbreytilegustu íþróttagreinum, s.s. fjallakrokket, blöðrusiglingum, risasápukúlugerð, risastrengjabraut, frisby-keppni og fleiri greinum fyrir alla fjölskyldumeðlimi.  Á veturnar er farið um jökla, m.a. fastur þáttur að fara í Grímsvötn um páskahelgina.

Um vef Fjallavinafélagsins

Þessi vefur er annars vegar samskiptavettvangur félagsmanna í Fjallavinafélaginu Kára og hins vegar til fróðleiks og skemmtunar fyrir aðra.  Við vonum að efnið hér á vefnum veki áhuga þeirra sem hafa áhuga á ferðalögum um fjöll og firnindi og geti jafnvel komið að einhverju gagni.  

Umsjónarmaður vefsins er Skúli Haukur en margir fleiri félagar eiga efni hér á vefnum.  Ljósmyndir eru m.a. frá Haraldi Teitssyni, Hauki Parelíusi, Haukur Hlíðkvist (Kvisturinn) Páli Helgasyni (Palla á móti), og Óttari Arnaldssyni.  Myndir úr Dimmugljúfrum tóku Ragnar Axelsson og Þorkell Þorkelsson ljósmyndarar á Morgunblaðinu og Hrafnhildur Skúladóttir, hirðljósmyndari félagsins.  Textar og greinar á vefnum eru yfirleitt höfundaverk Haukanna, en auk þeirra hefur Helga Finnsdóttir og fleirri skrifað fróðlega pistla um staði í náttúru Íslands.

Aftur á aðalsíðu